كلام مرايات

تعرف ان دى اول مرة ابقى متردد للدرجة دى ؟.. فى كل حاجة !.. مفيش تفصيلة بقول فيها حاجة الا و اراجع نفسى تانى و لما اتعب ، مفكرش !.. بنسى و بفتكر كلام ! كلام اتحفر خلاص فى ذاكرتى، و كلام كنت فاكره هيتحقق فى خطوات وطلع ولا حاجة.. و كلام ردم على كلام تانى بالتراب و كلام مدخلش فى الحساب اصلا ! ..عندك 100 حاجة بتفكر فيها ، او يمكن موهوم انك بتفكرى فيها ، او يمكن بتفكر بس مفيش علامات واضحة تبين انتى فى انهى طريق ماشية ! ماشيين ،، ماشيين ،، لكن عملنا ايه عشان نعلم الطريق اللى ماشيين فيه ؟؟ ولااااا حااااجة !!.. صور بس بتفكرنا بس بالطريق ده !.. صور تشوفها تنسى انت كنت بتفكر فى ايه و احيانا تعيط و احيانا تندم و احيانا تحزن و احيانا تكون ذكريات،، صح ؟؟؟؟؟.. و احيانا نتمنى انها ترجع و نصورها تانى و احيانا نتمنى اننا ننسى و لو مش عارفين نحاول و لو مش عارفين ندعى !.. حاجة اترسخت جوانا ؟؟.. المشكلة ان مفيش باب هروب من سجن الذكريات ! متحواط من كل مكان و الصورة ب1000 كلمة فتخيل هو عامل ازاى ؟!..

تبعد؟.. تبعد اكتر؟.. تستحمل؟ ليه؟.. تسامح؟ ليه مادام انت اصلا مش متسامح عمرك ما سامحت !.. تمشى الطريق؟ ولا تكمل؟.. فيه فرق وش !.. سبحان الله على الشبه بيننا و على كمية اللهم اعوذ برب الفلق اللى ممكن كانت تتقال فى ميت موقف، لكن كان المفروض كل واحد يحافظ على التانى قبل ما يقول قل اعوذ برب الفلق ، حرص و لا تخون زى ما بيقولوا ..و البعد هو احيانا، و فى كتير من المواقف هو العلاج الرسمى لاجعص مشكلة ممكن تواجه اى شخص باى حاجة او باى فرد..

الكلام بيوجع ! الكلام بيعلم فى نفس الانسان !.. انتوا ليه مش قادرين تستوعبوا ده قبل ما تنطقوا باى حرف ؟! ده الرسول هو اللى قالنا كده ! و ربنا.. و المشكلة الاكبر اننا بناخد حياتنا كلها كلام و فتح بوء و خلاص ، مصلحتى فين و اجرى وراها عشان امسكها و ابوظها عشان متجيش المصلحة لحد تانى !.. بنسمع كلام من اقرب ناس لينا و بناخد كلامهم موعظة حسنة ! من غير حتى ما افكر قبلها هو الكلام ده صح و لا غلط بالنسبة ليا !.. مفكرتش مرة تتنازل عن حقك ان يتقلك آسف و تقوم تعمل انت كده فى الاول ؟؟ .. ده حتى يعنى لو مغلطتش بس ارضاء للبنى آدم اللى قدامك و اللى بتعتبره على حد قولك انه مهم بالنسبالك ! .. تفسير كلمة مهم او حاجة بالنسبة لاى شخص لآخر فهى عبارة عن مراحل لازم يكون عدى بيها عشان يوصل و افعال اكتر توضح القول ده ، كل الناس عارقة و فاهمة دة جداااااااااااااا ، لكن التطبيق و الفعل زيروووووووووووو !!..

انت بتفتكر نفسك لما تلاقى اللى كنت فاكر انه مهم بالنسبة ليك هيمشى !.. دايما مش بنفتكر حياتنا الا ما تقرب النهاية !.. المشكلة الأعظم عند الانسان.. و الصراع الحيوانى الداخلى بين قراراتك انت صنعتها من قلبك و مشاعر و قرارات و حلول من عقلك و نفسك اللى داقت طعم الكلام و فنطتتة على حسب نوعة و المقصود بيه ، نفسك تردم كل ده ! صفحة جديدة ! ينفع اكمل الطريق و السواق مش عايز يكمل سواقة فى الوقت ده ؟؟!.. بتحاول تأكّل ال3 حيوانات هنا و هناك عشان كل واحد منهم يبقى راضى و يبقى مرتاح ! .. لكن انت بتاكلهم عشان يعيشوا على حسابك كده على فكرة !..و يا ريت افتكره بعقله ! افتكره بالتلاتة ! عقله و قلبه و نفسه ! .. ليه يوصل للمرحلة دى ؟؟.. و كلام قلته كان فى دماغك تنفذه بس بترجع و تقول المسامح كريم !.. لما تيجى تتعامل مع حد و تتكلم معاه و يكون بينكوا مواقف.. متنساش نفسك وسط كل ده فى النص، تايه و مش عارف تلاقيها، بتدور وسط كلام و افعال و مواقف و مشاعر رايحين جايين ! .. لما تلاقيها اوعى تسيبها تتحكم فيك ابدا و دايما اخضعها و اذلها "لله" بس و اعمل اللى يرضى ضميرك.. اعمل اللى يرضى ضميرك.. اعمل اللى يرضى ضميرك.. اعمل اللى يرضى ضميرك.. اعمل اللى يرضى ضميرك.. اعمل اللى يرضى ضميرك.. اعمل اللى يرضى ضميرك.. اعمل اللى يرضى عليه دينك و عقلك.. دينك و عقلك، دينك و عقلك، دينك و عقلك، دينك وعقلك، دينك وعقلك، دينك وعقلك، دينك وعقلك، دينك وعقلك..

 كل ده كلام معكوس من كذا مراية، صعب يتفهم زى ما هو سهل يتحقق !

المجد للشهداء
العبد الفقير الى الله

مَكتبة

مَكتبة ضَخمة بِرفوف مُتعددة يَكسوها التُراب و لا يتّضح غير القليل من كُتب ألوانُها تَكادُ تَظهر من شَبكة العناكب و التراب الذى يعلو سطحِها.. يَختلف عناوينها لمضمون حِبر سُكِبَ أفكاره على أوراقها.. كُتُب تُعبّر عن مواضيع الحياه كفروع ضخمة فى شجرة كهلة.. و ُكتُب أُخرى محفورة بعنوان " ليس للإطلاع " ..

فلم يحن الوقت بعد الذى يكشف المجهول فيه الستارة للجميع..

غُرفة ضخمة لا تعرف أبعادها من الظلام و اللانهاية التى تملأ أحشائها، ليس لها رائِحه مُمَيّزة، كأنه لا يوجد هواء من الأصل.. يوجد العديد من الصور الفوتوغرافية -التى لم تهرب من عاصفة التراب- لأشخاص فى أوضاع مُختلفة.. و أماكن أشعر بها وما دار فيها بداخلى.. ليس لها نهاية، آخر ما قد يستطيع نظرك الإتيان به هو مجموعة من الورق غير المُرتب على رفوف سوداء كبيرة، و فى الأعلى لافتة ضخمة تخطف نظرك عليها إسم ما و فوقها عبارة بارزة مرصعة بالذهب بعنوان " ذكريات "..

المجد للشهداء
العبد الفقير الى الله

الماركات

ما الذى فعلته ورقة حاملة لاسم شركة عالمى فى الناس؟.. أشترى ليه قميص ب700 جنيه لمجرد ان عليه اسم شركة عالمى؟ الاسم هيغسله و يكويه يعنى؟ نفس القميص هتلاقى فى محل ملابس عادى وما بين 100 ل200 جنيه!.. لكن فى مجتمعنا هى مش فكرة العلامة أو الشركة قد ما هى فكرة *الفشخرة* على الناس.. مع ان اللى بيتفشخر بهدومه على الناس، هو عريان بلبوص قدام نفسه.. وياما بيوت اتخربت عشان الاستاذه محتاجة ماركة عشان بنت ام صاحبه خالة جوز عمة أمها بيلبس ماركات و يلعن أبو فلوس اللى طالع عينيه شغل ليل نهار!!.. واذا اعترضت فأنت بخيل، جلدة وقيحة بالقانون النسائى.. الفكرة مش فى الماركات للملابس بس، فيه مطاعم الأكل والأنواع منها اللى تخليك تسف التراب لو أدمنتها، ومع ولولة الدكاترة ان الأكل الكتير من بره ممكن يسبب السرطان لا قدر الله و يزيد الوزن ويقل المناعه، لكن تلاقى اللى شهوته ممشياه وراه !.. الناس اللى بتصدر الماركات للدول العالم التالت المتخلف، مجتمعها مش بيهتم بالماركات أصلا، لكن احنا صدرنا بيحتضن أى خرا من الخارج!!.. من الآخر، كل واحد حر فى اللى يشتريه من أى نوع مادام هو قادر، واللى مش قادر ميحاولش يلهث ورا الماركات لانها هتخرب بيته رسمى.. واحنا على فكرة عندنا ماركات، عندك التخلف، الغباء، الجهل.. والكوارع.

إحنا لو إكتشفنا حجم الحاجات اللى مضحوك علينا فيها، هنلاقى نفسنا بهلوانات لسيرك العالم.

المجد للشهداء
العبد الفقير إلى الله

الوقت المناسب

الوقت المناسب أهم من الفعل نفسه..
انت ممكن تكون هتعمل قرار أو فعل كويس جدا، لكن تلاقى نتيجته صفر، وممكن تعمل فعل مهبب ويطلع معاك صح.. الفكرة هنا الوقت المناسب  للعمل ده.. زى الكلام برضو، فيه كلام مينفعش يتقال مع انه مش غلط، لكن الوقت غير مناسب، فلو قلته، هيضيع قيمته، وهينقلب عليك.. دوّر على الوقت المناسب اللى تقول كلامك أو تقوم بأفعالك قبل ما تنطق بكلمة أو تعمل أى حاجة.. الوقت الغلط هو الصخرة التى من الممكن أن يتحطم عليها الفعل أو الكلام الصحيح !.. عمرك شفت حاجة صح ممكن تبقى غلط؟ الوقت الغلط كثيراً بيكون الصخرة لكسر الصح ده.. فلو كان الفعل أقوى من الكلام، فالوقت الغلط أقوى من الفعل.

فيه أوقات مش بتبقى عارف تاخد اى قرار، فاﻷحسن ساعتها انك تفضل مكانك ومتخدش قرار وتستنى ظروف تتغير.. زى البحر ما بياخدك لمكان وانت مش حاسس.. الجديد حتى لو كان بسيط، ممكن يقلب الطاولة فى أى موضوع، فمتتسرعش.. قرارك لازم يعتمد على * انك عارف نتيجته *.. مترميش السنارة من غير طُعم تصطاد به.

المجد للشهداء
العبد الفقير إلى الله

فلسفة مصرى.. !

توجد بعض الأشياء الذى ُألقى عليها الضوء ولم تراها الناس، و أشياء ُألقى عليها الزبالة، فأجتمع حولها الناس !.  فلا تتعجب عندما ترى أحدهم يبيع ضميره مقابل شراء طاعة صاحب القوة والسلطة، حتى ترى فى طاعتهم و عبوديتهم بأن هذا الحاكم فيه ما لا عين رأت ولا أذن سمعت ولا خطر على قلب بشر!.. أتفوقنا جهلاً على زمن الجاهلية؟.. و تسليم عقله لهوى اعلامى يدس الخرا فى العسل، أى عسل؟.. آسف، يدس الخرا فى الوحل.. ألم أقل لك أنهم يتجمعون حول الزبالة؟

أسلوب الحوار وخاصةَ السياسى بين الناس، اذا ما خطرت فكرة اذاعته، فهو بالتأكيد *حصرياً* فى برنامج WWE للمصارعه !. الودنان أصبحوا من طين، حتى غزت عقول أغلبهم، فأحد يغذى *عقول* الناس بثقافته، و آخريين لا يشبعهم غير *البقول* و الفارق حرف واحد !.. فكرة انك تلاقى اتنين بيسمعوا بعض بهدوء وعقلانية حاليا، بقت قائمة على ان أحد الأطراف يكون مع آراء الطرف الآخر ققط، ولماذا لا تكلم نفسك فى المرآه اذاً؟ ما الفارق؟.. فنصيحة، لا تتكلم مع أى أحد الا اذا علمت أنه سيتقبل رأيك باحترام، غير ذلك اقلع الشبشب واجرى وراه .

* على فكرة احنا احسن من غيرنا * .. الجملة التى ضيعت بلاد و زرعت الخوازيق متنوعة الأحجام فى المنطقة العربية.. العراق قالت اننا احسن من فلسطين وليبيا قالت اننا احسن من العراق وسوريا قالت اننا احسن من ليبيا، حتى أصبح الكل على قدم سواء فى التفرقة العنصرية و التقسيم الجغرافى و الانهيار الاقتصادى وسوق لدول العالم الكبرى.. أما المصرى فلا يردد سوى هذه العبارة الأسخف من عبارة * هو قالك فين؟ * معتبرا دولته لندن العرب، مع أن بوركينا فاسو أكثر تقدماً ! .. فاذا قابلت أحد الذين يهتمون بترديد هذه العبارة السخيفة، فأضربه بالقفا و قل له * احمد ربنا، انت احسن من اللى قبليك اللى اديته بالبوانى فى وشه *.

* اللى نعرفه أحسن من اللى منعرفوش * .. سيبك من انم مفيش حد منعرفوش فى مصر، لكن المشكلة ان اللى بيقولك كده تلاقيه كفران طوول النهار فى الشغل وبيركب أتوبيس عشان يوفر النص جنيه عشان الطماطم بقت ب3 جنيه مع "يلعن أبو دى بلد أسعارها مش بتهمد" و لابس قميص طالع ميتينه عرق و بنطلون متخيط 10 مرات و معندوش غير 3 أطقم الزمن عمل معاهم الرزيلة، و بيقبض مرتب من المصلحه الحكومية مش بيكفي الشهر، و يرجع يقلع وياكل نفس الاكل، واتهرى زيت من الفول والطعمية لغاية ما هيبقى زى لون سبونج بوب، و يجيله محصل الكهربا و بعدها الميه يشفطوا دمه، و يغير بسرعه ويروح الشغل التانى و بناته فى الشارع يتحرشوا بيهم و مراته متهدلة معاه و عايزين مصاريف لكل حاجة بالشىء الفلانى، و يرجع البيت على الفجر، وينام 4 ساعات ويصحى فى نفس الدايرة !!.. وبعدها ينادى بنفس الرئيس والنظام بعد ما شلنا النظام اللى قبله اللى هو نفس النظام مجرسه ومطلع عينه !!.. دى مفيهاش عقل، دى الشعب " لسع " خلاص !!.. ولكن ربنا يقوى كل واحد كده !..

إن شاء الله خير..

المجد للشهداء

العبد الفقير إلى الله

وأنت مال أمك !..

وأنت مال أمك.. أقول هذه العبارة لكل من يقحم نفسه فى موضوع لا يخصه.. لكل من يبنى فكرته على بنى آدم لمجرد لبسه *سوى بعض القيود*.. لكل من يقول لى ( انت عايز تخس شوية.. انت عايز تطخن شوية.. اللبس ده وحش.. شعرك.. عن شعرى و أقف لأقول هذه العبارة، أما ما قبل شعرى، فأقول لهم * بس انا مبسوط كده * ).. لكل من يسألنى عن من الذى اتصل بى الآن.. عن الرجل بداخل الميترو أو الميكروباص الذى يدلدل رأسة كالزرافة معى فى التاب و يقول لى * الصورة دى جامدة فشخ يا برنس *.. لكل من ينصحنى بشىء وهو عنده نفس العيب وأكثر تشدداً.. الذى يحاول فرض رأيه علىَ.. الذى يضع منخاره وأنفه فى كل شىء.. عن الذى يسالنى عن الهدية المغلفة وما فيها.. عن الكيس الذى يحمل عشائاً لى ولأسرتى ويود معرفه ما بداخله.. عن الذى ينظر ل*يمحلس*، دون كلام.. لكل من يسألنى، انت بتكره السيسى ليه؟.. و أخيراً لأبنى العزيز الذى اذا سألنى * ايه اللى حصل يا بابا فى الثورة بتاعتكوا؟ واتعمل فيكوا ايه؟ * فلا رد سوى، و انت مال أمك !؟.

أنصح وبشدة أعضاء لجنة وضع الدستور المصرى بوضح مادة تفيد ب : " وانت مالك أمك " لقولها لكل من يقحم نفسه فى أشياء لا دخل لأمه فعلا فيها سواء لب لها الشتيمة.

ملحوظة : مش كل اللى حوليك تقولهم كده، اللى مش من حقهم بس..

المجد للشهداء
العبد الفقير إلى الله

خليك فى خصوصياتك..

ليه تبقى كتاب مفتوح لأى حد؟.. ليه أى حد يعرف عنك كل حاجة؟.. حتى أمك و اخواتك و مراتك؟.. ليه مش بتتمتع بلذه الخصوصية؟.. تحس انك حر فأى حاجة بتعملها، حتى اللى بتعمله من خلال أمر، بيكون *بمزاجك*.. لكن مزاجك ميتحكمش فى عقلك، مزاك يكون تحت وطأه عقلك.. محدش يبقى متوقع رد فعلك فى بعض الأشياء، رد فعلك أو فعلك نفسه.. هيجيلك وقت تحس فيه انك ُمكبَل لأن كل حاجة بتعملها هى متوقعه، فهتبقى انت واللى حوليك زى العيل الصغير اللى بيحط ايديه على عينيه ويلعب استغماية مع ابوه وأمه ويمثلوا أنهم متفاجئين و انهم مكنوش يعرفوا مكانه، عشان بس يفرحوه !.. أيوة هتكون كده، لو محتفظتش لنفسك ببعض الخصوصية.. انت بس اللى تقرر امتى تتكلم وامتى لا، امتى *عايز* تتكلم وامتى لا.. خلى الناس تعرف عنك الحاجات اللى * انت عايز تخليهم يعرفوها * و بس !.. أكيد مش كلها، وأكيد مش كل حاجة تبقى معروفة، متخليش حد يعرف آخرك إيه، وإزاى، لو عرف هيعرف يجيبك، لو مش واثق من نفسك، على الأقل متبينش ده للناس، ومش لازم تمثل، متخليش اللى قدامك يحاول يحفر وراك، خليك واضح فى الحاجات العامه، الحاجات اللى بالنسبة ليك عادى إنها تتعرف، واعمل حساب درجة قرب اللى بتكلمه.. يعنى مش أى حد تكلمه، اللى انت واثق فيه بس هو اللى تكلمه فى شىء من الخصوصية، و درجة الخصوصية متعددة.. فيه الخصوصية اللى محدش يعرفها غير نفسك، وفيه اللى تعرفها أمك وأبوك ومراتك، وفيه اللى يعرفه أخواتك وفيه اللى يعرفه أصحابك.. خصوصيتك حاجة استثنائية، عشان كده متكلمش غير الإستثنائيين اللى فى حياتك.. هتلقيها حاجة ممتعة إنك مش مفهوم أوى ولا غامض أوى للى قدامك، ماسك زمام الأمور، بعقلك تقدر تخليه يعرف الحاجة دى أو تفكيرك فيها ايه، وبإيدك متخلهوش يعرف.. و مرة تانية وعاشرة : " خلى الناس تعرف عنك الحاجات اللى عايز تخليهم يعرفوها، وبس " .

المجد للشهداء
العبد الفقير إلى الله