الحياة حلوة..

الحياة حلوة..

من أهم عيوبنا "رؤيتنا" للحياة.. للمواقف.. للمشاكل.. الحلول.. بنشوف الحياة فى مظهرها، ونقارن. بنشوف المواقف فى أشخاصها أو أطرافها فقط، ونقارن. بنشوف المشاكل من باب التفاهات و باقى الأبواب "تؤجل الى أجل غير مسمى" ، و نقارن. بنشوف الحلول اللى تريّح، لكنها فى وقت "قصير" ، و نقارن.

 الحياة حلوة و انت معندكش مشاكل، بس مش محتاجة منك مقارنة بينك وبين غيرك.. لكن محتاجة رؤية مختلفة وايجابية فى كل حاجة حوليك، مثلاً..

صاحبك أحسن منك فى المستوى الدراسى؟ شوف اللى مش عارف يتعلم أصلاً، الأهم تكون ناجح فى مكانك مش فى مكان غيرك.. والدك أو والدتك قارفينك؟ شوف نظرة اللى فقد حد منهم و عمره ما هيشوفهم تانى الا عند ربنا.. معندكش عربية؟ شوف اللى بيتشحطط فى الأتوبيسات عشان يوّفر ربع جنيه.. رجلك اتكسرت؟ شوف اللى عاجز و قاعد على كرسى أو اللى بتر رجليه.. مخنوق من الدراسة؟ شوف الصبى اللى شغال فى الورشة و اللى الظروف حكمت انه ميتعلمش.. متجوزتش اللى بتحبها؟ يبقى ربنا عاينلك الأحسن، مش أحسن ما تتطلقوا بعد كده.. عيالك مغلبينك؟ شوفى نظرة الأم اللى قدرها حكملها انها متخلفش.. معكش فلوس كتير؟ شوف اللى بياكل من الزبالة و اللى مش لاقى الرغيف الحاف، واللى بيشرب مية مش نضيفة.. غيرك بيلبسوا أحسن منك؟ شوف اللى عنده هدمه واحده، صيف و شتاء.. قول الحمد لله.

شوف كل حاجه مضايقاك وهتلاقي ألف سبب تحمد ربنا انها جت على قد كده.. بصلها بنظرة ايجابية هتلاقيها حلوة، وعلى فكرة انت كده ما بتخدعش نفسك، لا، ركز هتلاقي كل حاجه قولتها صح فعلاً، بس انت .. حاول.

المجد للشهداء

العبد الفقير الى الله