يبقى انت اكيد فى مصر

_ اللى معندوش " مزة " يبقى " طزة " (( كل واحد عارف نفسه ))
_ الشعب اللى لغاية دلوقت بيركب " العجلة " ب" الجلبية "
_ بيعتبر ان شرب العسير بالشاليموه للسيس فقط
_ الرجولة انك تشرب سجاير
_ بيعتقد ان البييييييييييض بيتّاكل
_ لسه بيقول بنزيم و سورال (( من حقهم يقطعوا عنكوا البنزيم خالص ))
_ بيكون قاعد فى امان الله على الفيس ساعتين و لما يزهق و يقفل يروح بعد 5 دقايق يشوف ايه الجديد
_ اول الامتحان يقرا قران و المعوذتين و يسبح و بيربى دقنه (( الرجالة )) قبليها عشان ربنا يباركله ، و اول ما ياخد الورقة يطلع البورشام
_ بيغسل سنانه كل سنتين
_ بيضرب بصل على الفطار و الغدا و العشاء ، و مش عايز حد يشتمه
_ بيفتى فى اى هتش ، المهم عنده ميسبش الورقة فاضية
_ بيقول كلام مش عارف معناه ، لكن بيحبه عشان شكلها حلو او انها ماشية مع شخصيته
_ بيموت فى الحزين ، تلاقيه مبسوط يقوم مشغلك اغنية حزينة زى (( الست لما ))
_ بيموتوا فى الفضايح ، يا سلام لو شافوا على النت مثلا مكتوب فضيحة (( ناسنى او هيفاء )) هتلاقى امم اتفرجوا عليه
_ يحتفظ الحاكم بغيارات المتغطى بها عريان، غيارات غير نظيفة وغير مريحة،والادهى من ذلك غير ساترة له،بل تساهم فى ابراز عوراته
_ الغيارات فى مصر هى معيار تقييم نضافة الرجل فى مصر ، فالرجل النضيف فى مصر هو الذى يلبس غيارا نضيفا كل يوم ، و لكن العجيب ان يستحمل حاكما 30 سنه
_ no women..no cry
_ اكتر كلمتين ميقدرش يقولهم لانها ممكن تهز رجولته و البنات ايضا (( مش عارف_مش فاهم )) ، دى تبقى معجزة لو قدرنا نقول الكلمتين دوول مرة واحدة
_ عاوز يجيب 99% و هوا لسه فاضله صفحة و يبدا فى ال200 صفحة اللى وراه
_ الوحيد اللى بيذاكر قبل الامتحان بيوم واحد بس و بيكون على القهوة بقيت السنه
_ الوحيد اللى بيجمع حاجات رمضان قبليها بيوم واحد (( كلهم ))
_ بيتفرج على 10 مسلسلات الصبح و 10 بليل ، و الفطار راحة (( عشان يضرب الضربة و ينام و سلملى على رمضان....اللهم بلغنا رمضان ))
_ بيطلع من نص التراويح و يروح يضرب حاجة على القهوة (( يزوّغ )) و يرجع البيت بعد ما يخلصوا
_ بيشتم فى الامام لو طوّل فى الصلاة و ممكن يدعى عليه كمان او يضربه لما يخلص
_ عاوزيين يفصلوا ناس فى البيئة الى حوليهم على مزاجهم عشان مش عاوزيين يتعبوا فى حياتهم
_ بياخد الدين بالمظاهر الخارجية
_ بيحط عقله بعقل ابن اخوه الصغير اللى عنده 4 سنين و يكلمه على اساس انه فاهم بيقول ايه و هوا بيشتم اصلا بس بلغته
_ لما بيشوف طفل بيضحك ، بيفضل يبص حوليه عشان يشوف الملايكة اللى الطفل شايفهم
_ الشتيمة دلوقت بقت بالدين ، و يقللوا من كلمة (( امراة )) و يشتموا بيها باسم (( مرة ))
_ طبعا لما بيلاقى الاشارة حمرا انتوا عارفين بيعمل ايه
_ طبعا مش هكلمك على الاخلاق مع السياح الاجانب (( الاقصر بلدنا بلد سواح فيها الاجانب تتزئلط ))
_ عدد الاولاد اللى عمله اكونت باسم بنت اكتر من عدد البنات نفسه على الفيس بوك
_ مدرس الفيزياء بتاعى كان واخد (( اللمبى )) مثل اعلى... ده بجد (( ربنا يسترها علينا ))
_ بنحب و احنا بنتصور نتصور باشكال غريبة ، اللى يحولّك عينيه و اللى يطلعلك لسانه و اللى ينعكش شعره ، المهم تكون الصورة فيها هبل و خلاص
_ بنحب نصلى الصلوت الخمس مع بعضها بليل عشان معندناش وقت ، الواحد بيطلع عين اهله فى البلاى ستيشن
_ بنحب نتفلسف و نتكلم انجليزى و احنا مش فاهمينه اصلا ، و يا سلام بقى لو تكتب الانجليزى على الشات عربى...مزيكا على راى عادل امام
_ اول كلمة تطلع منه بعد نتيجة الامتحان...المدرس هوا ابن.......اللى ضيّعنى يا بابا
كل ده اقل حاجة عن الشعب المصرى ،و لذلك افتخر دائما بمصريتى
ملحوظة: انا لم اقل رايى فى اى جزئية من هؤلاء ، لكن كل واحد عارفه نفسه

المجد للشهداء
العبد الفقير الى الله