معلش !
نزل هيمه من بيته متحمسا الى العمل و الى نهضة بلده و انتظر قليلا لكى
يصعد الاصانصير فناداه عم عبده من تحت " يا باشيه الاصانصير عطلان " و قال
هيمه (( معلش )) ننزل على السلم و اهو رياضه برضو .. و هوا نازل من الدور
السادس و عند الدور الثالث البنطلون اتبل عشان الحجّه سمية عامله عمل
للحجّه زينب عشان بنتها فتكات اتكعبلت قبل كده عند الباب بتاع الحجّه زينب ،
و بكده " قطعت الشورت فى الفيسين " بأن زينب هيا اللى عملت العمل لفتكات
بنت الحجّه سميه وعم الشيخ قالها تحط الحجاب و ترش ميّه !! ، و قال ((
معلش )) اكيد غصب عنها او انها بتغسل الحته اللى قدام الباب بتاعهم .. طلع
هيمه الى بيته و فتحت له زوجته حسنات " ايه اللى بلّك يا راجل .. اقلع يالا
عشان اغيرلك " قالها هيمه : تغيّريلى !! هوا انا عيل صغير و لا ايه !! ده
الملافظ سعد يا سونه ، بس (( معلش )) الزوجه لزوجها برضو كالبنيان المرصوص
.. فقلع هيمه و ادالها البنطلون و غيّره .. قام جرى على التلاجة عشان ياكل
حته الشوكولاتة اللى كان مخبيها من سونه و دوله ابنه ، فأتسعت عيناه من هول
الفجعة لما لقى حته الشوكولاته متّاكل منها ، بس (( معلش )) اهو الولا
ابنى برضو وبالهنا والشفا ، ونزل هيمه الى الشارع فرحا نشيطا للعمل ولنهضة
البلد ، و فى عز الضهر عشان يوقّف تاكسى واحد فضل قاعد نص ساعه ، و قال
لنفسه (( معلش )) اكيد الدنيا زحمة وفيه سواقين مش فاضيين ، الله يكون فى
عون عبيده برضو .. وبعد ان حصل هيمه على جائزة ركوب تاكسى فى وقت قياسى "
نص ساعة " لعام 2012 كان فرحا بذهاب ضوء الشمس على قرعته اللى خللت من
الوقفه !! ، بس التاكسى كان بعافيه شويه و اتعطل بعد قطع مشوار طوييييل "
آخر الشارع " ، وقام السواق مناديا على هيمه عشان ينزل يساعده " ايدك معانا
يا ريس لو سمحت " ، قال هيمه (( معلش )) اهو ايد بايد تساعد و الناس
لبعضها ، ونزل ساعد السواق والحمد لله مشيت على خير ، وجه هيمه يحاسب
السواق دفع اكتر من العادى ، بس قال (( معلش )) اكيد غلبان وعنده ولد ابن 7
مستعجل اوى ومراته بتغسل كل يوم و والحياه اصلها صعبه .. و طلع العماره
اللى فيها الشغل فى الدور الرابع على السلم برضو ! بس قال (( معلش )) كله
يهون عشان نهضه البلد ، وتهيّأ لهيمه ان الباب اتفتح لوحده ! لكن هوا مشفش "
سحلول " صاحبه من دخان الشيشه و المخدرات و السجاير ، ودخل النونو " هيمه "
عشان يظيط مع اصحابه و يروق الدى ويكبر الجى ، واكيد هينهض لما الست شوشو
تيجى عشان تروّق القعده ، و على رأى المثل اللى مش موجود اصلا "" من غير
شوشو .. ما آآآحبوشو "" و قال (( معلش )) احنا... بننهض
هوا انت
فاكر ان " المصرى " هيتحمل كوووووول ده عشان يروح الشغل " الحكومى " اللى
بيقبض منه 200 جنيه فى الشهراللى يخليه يعيش " فرخة "مش بنى آدم و كمان
مطلوب منه ينهض بالبلد !! احب اقولك (( معلش )) !!
ايضا لابد ان
يأخذ فى الاعتبار ان عليه مسئولية فى نهضه نفسه بنفسه وان يؤمن بقضاء الله
وقدره و ان يحاول بالطرق و الوسائل التى " بين يديه " التى اعطاه الله
اياها ليستخدمها لمنفعه نفسه اولا واصلاحها ،وهكذا تنجح المجتمعات "
اجتماعيا "
مازال عندى الامل و التفائل بأن القادم افضل واننا سنسير قريبا فى طريق التغيير الحقيقى للفرد وللمجتمع .. :)
المجد للشهداء
العبد الفقير الى الله
ليست هناك تعليقات:
إرسال تعليق