مصر هىّ أوضتى !

مصر هيّ اوضتى ! >>>> " مهمه جدااا " ... (:

اول ما تقرأ العنوان عايزك تشوف اوضه سيادتك شكلها ازاى !؟ ولا اقولك انا مش هتعبك واخليك تروح بتاكسى وتيجى بتاكسى والكلام اللى ملوش لازمه ده ، هقولك انا هتلاقى فيها ايه !!؟ .. صلّى على اشرف خلق الله سيدنا محمد عليه افضل الصلاه والسلام ..

هتلاقى جزمتك او كوتشيك معلقهم مع الغسيل ب" مشبك " من الرباط بتاعهم !!؟ متعرفش ليه !! بس (( اهو كيفى كده )) .. " البطالة " ،،، هتلاقى دولابك مفهوش غير طقم واحد بس والباقى بتحب تشوفهم جنبك على السرير .. " التحرش " ،،، هتلاقى دولابك يعبر تماما عن مستقبلك ، مش عارف تظبّطه ولا ترتبه .. " المستقبل "

هتلاقى التكييف والمراوح مشغلهم ليل نهار عشان تهوّى " قفاك " من الغدر والخيانه والكذب .. " صفات مجتمع " ،،، هتلاقى نفسك فجأه بيجى على هواك انك تاخد (( المخدّه )) وتنزل فيها ضرب وتقطيع لغايه ما يظهرلها صاحب وتطلع ابو اللى جابها الاوضه عندك ، ولما بتكون سعيد وفرحان بتاخد نفس المخدّه وترقص معاها وتحضنها اوى و ورومانسيه بقى وكده على اغنيه (( وشربت حجرين على الشيشا )) .. " الزوجين المصريين "

هتلاقيك جايب مكتب الكمبيوتر بتاعك مش عشان تحط عليه الجهاز ،، لا لا لا ابسولوتلى ،، انت جايبه عشان تحط فيه زبالتك لما تيجى تاكل او تشرب ، فبدل ما تقوم بالتاكسى بتاعك تروح المطبخ ترمى زبالتك لا بتروح تحطها فى " درجك " ، ومش عايز يجيلك فران او حشرات فى الاوضه !! ده انت تحمد ربنا انك متسخطش لفار اصلا !! .. " الزبالة "

هتلاقى المكتبة بتاعتك فى الوش فيها كتب عظيمه لنجيب محفوظ ونبيل فاروق والشعراوى ، لكن حتى محاولتش تبص على اسم الكتاب ، جايبهم ليه ؟؟ الاجابه النموذجيه للبيت المصرى : جايبهم " زينه عشان نبان اننا مسقفين يا عم " !! ، وانت قلتلى انك عايز تتقدم ك" فرد " ! انت ممكن تتقدم ك" قرد " .. شفت النقطة بتفرق ازاى يا سحلول انت وهوا .. " الثقافة "

هتلاقى اهم شىء فى اوضتك (( السجادة )) لانك بتحط فيهم الفلوس اللى بتسرقهم من البوك بتاع امك لما ترجع من بره ، ومن جيب ابوك لما تيجى اللحظه التى ينتظرها كل ابناء هذا الوطن (( دخوله الحمام )) ، و كمان تسرق اى حاجة تذل اهل اللى جابوا اخوك عشان بس تهدده ينزل يجيبلك من تحت (( لبان فرفور )) .. " السرقه_الامانه_الثقة "

هتلاقى عندك مجّ بتحبه جدا جدا وبتشرب منه العسير والميّه وكل ما هو (( شراب ولحيه )) ، وفى يوم من الايام وانت فى لحظه هيجان موسيقى من الروك والميتال اللى قارف ام سكان العماره بيهم و انت متأثر وبتعتبر المجّ هوا الجيتار فجأه فى آخر الاغنيه اوالموسيقى رميت المجّ فى لحظه تأثر وانكسر بسببك بسبب اهمالك ، وانكسر معاه قلبك ونفسك لانك ارتبط بيه بشىء مبالغ .. " الحب المصرى "

هتلاقى مسطرتك بتلعب بيها فى سنانك واحيانا فى شعرك عشان (( القمله )) ، وقلمك بتعبره فرشه الرسم بتاعتك عشان تطلع فنّك البديع على مكتبك(( ومازال الشعب المصرى يرسم الايد من غير صوابع !! )) ،وكشكولك ارطاس لب ،ولو بصيت قدامك هتلاقى كتابك فى حمامك ، اصل بنحب نذاكر على نضافة !! .. " التعليم "

هتلاقى المرايا بتصورلك مكانك ، تروح ديسكوا تلبس كوول ، تروح مع اصحابك تلبس العادى ، تروح مع اهلك تلبس اللى امك كانت عايزاه ،تروح الجامع تلبس جلبيه ،عامل زى السحليه بتتلون على حسب المكان اللى انت ماشى فيه !! .. " الثقة بالنفس "

هتلاقى موبيلك فى البيت زى الدى جى فى الافراح الشيعبية !! .. " كلكسات العربيات "

نكتفى بهذا القدر من سلوكيات مجتمع سيتغيّر ان شاء الله بنا او بالاجيال التى تلينا .. مادام فيه " عمر " يبقى اكيد فيه " امل " امال هيجيبوا " مستقبل " ازاى .. :)

مصر هى الجزء المكبّر من هذا ، فأعلم انك تؤثر بالفعل فى مجتمعك ويجب ان تبدأ فى بناء نفسك وطنيا واخلاقيا وطموحا ورسالة .. :)

ملحوظة : لو فيه حد مفهمش الغرض من اى جزئيه فى الفكره يقولها فى كومنت وهشرحهاله .. :)

المجد للشهداء
العبد الفقير الى الله